Downo tymu w moim Zawadzkim boło stare kino. Pierwszy budynek, kaj boło, boł drewniany, wedle parku niedaleko huty, kaj tyż boła muszla koncertowo, tyż drewniano.

Nie wiam, jak to boło, że fojerwera (straż pożarno) dopuszczała do użytku. Ale jakoś szło.

Niedzielne poranki

Za bajtla ( w dzieciństwie) w niedziela po mszy w kościele Św. Rodziny szli my na poranki, pamjyntom najbarzyj bajka ło koniu Leokadii, po naszymu Kadii.

Potym rozebrali tym budynek i zaczyli budować łobecne kino. Fest sie gorsza, bo łone stoi próżne, mało co sie dzieje. Niekiedy przyjyżdżo kino objazdowe, abo gmina mo jakieś uroczystości.

Szumny budynek, ale co poradzić.

Na czas rymontu seanse odbywały sie w Domu Kultury, na I pjyntrze. Warunkiem, coby puścili film, boło 20 widzów. I my tak sie umawiali w szkole, boby zawsze boło te 20 osób. Kino kosztowało grosze.

Pewnego razu jakoś my sie zagapili w szkole, co leci. Moja kamratka Gryjtka ( Małgosia) mi godo, Johana, idymy do kina. Nie miałach szpecjalnych planów, to godom: dobra. Idymy.

Przyłazimy do Domu Kultury, a w holu czekajom same chopcy.

Pytom:

-Grytka, a co dziś grajom? , a ona godo, nieważne, jak my przylyźli, to łoglondomy co je.

No i włażymy na sala , zgasło światło, leci reklama, a łoroz zaczyno sie właściwy film.

ARNOLD SCHWARZENEGGER _ PREDATOR.

Dobrze, żech siedziała na mjynkim zicu ( siedzeniu ), bo bych tam chyba padła na zol (podłoga) ….

Myślałach że zabija Gryjta, cołki film boł ło jakiś pierońskich potworach, kiere polowały na ekipa Arnolda, gonitwa, dżungla, afy (małpy) , rostomaite zwjyrzynta. Lotanie, strzylanie, larmo jak pieron ( duży hałas).

Nie dość , żech straciła czas, to nic z tego filmu mi nie łostało, oprócz zgorszynio i złych wrażyń.

Nie bołach potym zdziwiono, że same chopcy byli na poczekalni.

Także, zawsze patrzcie na repertuar. Tyn film zapamjyntom do końca życia, a niy ciyrpia takich filmów do dzisio.

Johana

ZOSTAW ODPOWIEDŹ

Please enter your comment!
Please enter your name here